Act 11 | TVK | STEP | Longeongen xa bit ngan xil xa latave Siu ti lake reitin e sepinien na Hi mei duxoh eloheoh xil na Iesu del Siu sav xil mun xa laneket e ladi Sudea.

Acts 11

Ngan Xil te Sias tahal Serusalem Lalongeong ni xa Ngan Xil xa Latave Siu Ti Mei Laneket

1 Longeongen xa bit ngan xil xa latave Siu ti lake reitin e sepinien na Hi mei duxoh eloheoh xil na Iesu del Siu sav xil mun xa laneket e ladi Sudea. 2 E melele xa Pita bemei e Serusalem, rut Siu xil lamei lasepin nggeih xati vengan xa lanemi labit ngan xil vus xa laneket e Iesu lihusil xat sexien te vexaho. 3 Xil labiteni mi Pita labitene, “Xouk oteha otete tim sa ngan xil xa latave Siu ti e di oteanien mun tetel xil.” ^{▼▼11:3 Mol-Siu xil labit melele xa lavituei del ngan xil xa latave Siu ti, ngan ak ipol ni limei lihe muis pe met Hi.}

4 Ma Pita misep kila mi xil usil holesok xil xa testal kokot mini ba duxoh hoxalite teni bitene, 5 “Melele xa natete taon tahal Sopa, di natesis. E melele xa di tamu natesis, natepus metuveen tei. E metuveen ak, tilang hat temasel e kaliko tei xa mahulong latesae ni texo kusute xatel texo ut nesao temei temal vari ni nou. 6 Natetei hiraek teha en, natepus hisit vongoro ngasen, ngan xil xa lamah e ngan xil xa labe vuran, tetal xil e tuman xil mun. 7 Di, natelong rae tei temei ni nou tehitene, '!Pita tamea! !Uhas ti xil e ua ni!'

8 “E inou natehitene, '!Suv, nasakras napol vamak! E meulien navan, inou natakar pis ti mu holesok xil xa latamese ti mu xa tavos ti pe metom tengan lava ni.'

9 “Di, rae texo ut nesao tesepin rilomun minou tehitene, 'Naha xa Hi bit memese ngamu, xouk onanem ni ti onahit tavos ti.' 10 Sexien ak testal minou tehe vatol, di, kaliko ak tetilomun tehe ut nesao.

11 varinga tang, moletin tol xa latosil xatel latexo Sesaria latemei latesoh momal visal nim xa nateta en. 12 E Ninin Eo tehiteni minou tengan nihusil xatel matiha, ninanem ti nasa ve xil. Di, moletin xil ak mun tahal Sopa xa labe tei e he sav (6) latehe xametel mateha matehe nim e tim sa moletin tei, hisen Konilias. 13 Xi tehiteni mi xametel xa masxaxa tei mei testal mini. Masxaxa ak tesoh e tim san e tesa sepinien ak mini tehit, 'Usil moletin ti xil lihe taon tahal Sopa tengan ha lipus moletin tei, hisen Saemon Pita. 14 Moletin ak ihiteni minuk itel ngan xil vus xa ladi e tim sam usil suse xa muhur meulien hu en.'

15 “E melele xa di tamu natesepin, Ninin Eo mei tepolu e meulien nae texoni ngan xa tepol kokot ni mi xir. 16 Di, natenem rilomun ni naha xa Suv Iesu tehiteni mi xamem tehitene, 'Sion teterir ni moletin xil ni oei, e xamim, literir ni xamim e Ninin Eo.' 17 ?Misak ni xosxa Hi bit ngan xil ak lakila lihur sanien nan nggoni ngan taxa tesa ni mi xir melele xa rateling neketen nar e Iesu Kristo, ma inou nabe visi iaxa nakila nisikoe xol Hi?”

18 Melele xa lalong Pita misepin mak, latasepin ti mun vari vasa. Di, lapet rat his Hi e labit, “Taxeak, Hi misah suse tengan moletin sav xil xa latave Siu ti likila mei lihiles meulien nae e lihur meulien hu.”

Longeongen Hos Bemei mi Moletin Xil tahal Antiok

19 Melele xa sakpurunien temei te xeih e Serusalem, tetutou ni melele xa Siu xil latehov vin Stivin, rut ngan xil xa laneket e Iesu latetasil latehe rute sav xil. Rute latehe Ponisia, rute latehe aelan tahal Saepras e rute sav mun latehe taon tahal Antiok. E melele xa lateti e rute xil ak, di latesetu mi Siu xil kestang. 20 E rute e xil xa latehe ngan Saepras e ngan Saerin, melele xa latexo Serusalem latemei Antiok, xil di latsetu usil Suv Iesu mun mi ngan xil xa latave Siu ti. 21 Xeihen na Suv di mi xil, e moletin holu labiles meulien nae e laling neketen nae e Suv Iesu.

22 E Serusalem, ngan xil te sias lalongeong ni xa ngan xil xa latave Siu ti mei di laneket. Mak, ma lasil Banabas be Antiok. 23 Melele xa Banabas ba duxoh Antiok, pusi xa tuxolxatien na Hi di mi xil e memaal ven. Di, misel xat xil tengan lisoh ixeih e neketen nae e lihusil kuh Suv Iesu. 24 Banabas be moletin tei xa bos, neketen nan nggeih e Ninin Eo polu en. Mak, ma setuen nan misak ni moletin holu labiles meulien nae mei laneket e Suv Iesu.

25 Di, Banabas be taon tahal Tarsis tengan valang ves Sol. 26 Melele xa mikameti, dela lube Antiok. Huram tevi tei, luleh viton ngan xil te sias tahal Antiok e di lupispisi mi moletin holu. E rute ak vari, ngan xil xa laneket, latekes kokot ni xil ni 'Kristin'. ^{▼▼11:26 Tetiamu, mosav xil latesep pepamen ni ngan xil xa laneket e Iesu e latekes xil ni 'Kristin', xa koute teni be 'moletin xa nggusil Kristo.' Xil lanemi labit Iesu tehe vatxeih tei xa tehur longpangasien ve sexien tesa nan. E melele xa ngan xil xa laneket latelong ni his ak, xil lamaal tang ven.}

27 E melele nen ak, provet ngan xil te Sias tahal Serusalem lamei e Antiok. 28 Tei e xil xa hisen Akabas misoh e hilaep te moletin xil e xeihen na Ninin Eo mei polu en. Xi mike mese ni xa pangasien tei te mae kekaten imei ikapis e ut etan (ngan ak testal sung e melele xa Klodias tehe suv toto tahal Rom). ^{▼▼11:28 Ngan ak tehe reitin, e AD 41-54 us tamus ti e anien mun tenapin ti. E melele nen ak, Sias tahal Antiok tetutou ni Kristin xil tahal Serusalem.} 29 Kristin xil kekes e Antiok laling xati xa lisa ti sanien eah xa xi mikila ipol ni iha itutou ni tua nae xil xa ladi provins tahal Sudea. 30 Ma lapol ni, e lalingi e he Banabas xal Sol tengan ha lalsa ni mi elda xil te Sias tahal Serusalem.